साना बच्चाहरूका लागि केही पोषणयुक्त खानेकुरा निम्न छन्:
धेरैजसो खाने खानेकुरा, जसमा यी अन्नहरू पर्छन् (भात, गहुँ, मकै, कोदो, किनोवा), जराहरू (कसावा, तरूल, आलु ) र माड भएका फलफुलहरू (केरा र कटहर)।
प्रोटिनयुक्त खानेकुरा जस्तै: रातो मासु, कुखुराको मासु, माछा, कलेजो र अण्डा (जति धेरै दिइयो त्यत्ति राम्रो हुन्छ)।
दुग्ध सामग्रीहरू जस्तै, चीज, दही, र पाउडर दुध (अरू खानेकुरासित मिसाउन मिल्ने, जस्तै पकाएको परिज)। यी कुराहरू स्तनपान गरिरहेका शिशुको जीवनको दोस्रो ६ महिनामा खुवाउनु धेरै राम्रो हो। काँचो दुध बच्चाले पचाउन सक्दैन, त्यसैले माथि दिइएका दुग्ध सामग्री तिनको लागि धेरै राम्रो हुन्छ।
हरियो पात र सुन्तला रङ्गका तरकारीहरू, जस्तै: पालुङ्गो, ब्रोकाउली, चाइनिज साग, गाजर, फर्सी र सखर-खण्ड (यसमा धेरै भिटामिन हुन्छ)।
गेडागुडीहरू जस्तै: सेतो चना, दाल, बोडी, राजमा र लिमा गेडागुडी (विभिन्न प्रकारको खानेकुरा होस् भनेर अनि पर्याप्त प्रोटिन, शक्ति र आइरन प्रदान गर्नको लागि)
तेलहरू, जस्तै: तोरी, सोयाबिन र रातो ताडिको तेल, बटर वा मार्जरिन।
बियाँहरू, बदामको पेस्ट अर्थात् लेदो, अरू काष्ठफल पेलेर बनाइएको लेदो र भिजाएर वा टुसा पलाएको बियाँहरू, जस्तै: फर्सी, सूर्यमूखी फूल, खरभुजा वा तिलको बियाँहरू (शक्ति र केही भिटामिनहरू प्राप्त गर्नको लागि)।
माछा-मासु नभएको खानाबाट साना बच्चाहरूलाई चाहिने पोषणतत्त्व प्रदान गर्न गाह्रो हुन्छ। किनभने जनावरको मासुमा आइरन जस्तो अत्यावश्यक पोषणतत्त्व पाइन्छ। कुनै बच्चाले माछा-मासु खाँदैनन् भने तिनलाई थप मल्टिपल भिटामिनको ट्याब्लेट वा पाउडरको रूपमा, वा भिटामिन थपिएको पाउरोटीमा दल्ने वा पोषणयुक्त थप खानेकुरा खुवाउनुपर्छ।
बिरूवाबाट पाइने आइरन मानिसको शरीरले राम्ररी लिन सक्दैन। तर, गेडागुडीहरू (सेतो गेडागुडी, सेतो चना, दाल) मा धेरै आइरन हुन्छ। यी खानेकुराहरू प्रशस्त भिटामिन सि भएका खानेकुरा जस्तै, सुन्तला र अमिलो फलफुल र जुस सँगै खाइयो भने मानिसको शरीरले राम्ररी आइरन सोस्न सक्छ।