वैवाहिक भूमिका ल लेके होवइया झगरा ल मैं कइसे रोक सकत हंव?
From Audiopedia
अगर तुमन ल लगथे के तुंहर घरवाला हर तुंहर योजना के खिलाफ हो सकत हे, त ओखर सहायता हासिल करे बर, तुमन अइसन परयास कर सकत हव:
1. अपन घरवाला करा गोठियाए के पहिली अपन योजना के बारे म बने असन बिचार कर लेवव। अगर तुमन, खुदे नइ जानहु के तुमन ल का करना हे, कइसे करना हे, त तुंहर घरवाला हा तुंहर बात नइ समझ पाही अउ फेर तुमन ओखर ले मदद के आस कइसे करहु?
2. तुमन ल जेन भी कुछ करना हे, ओखर बारे म पक्का रहव, लेकिन झगरा झन करव। अपन सोंच के बारे म अपन घरवाला संग सांति ले गोठियावव, लेकिन ओखर उपर चिल्लावव झन या फेर रोवव झन। सांतिपूर्ण तरीका ले तुमन ल जादा फायदा हो सकत हे।
3. अपन घरवाला ले सलाह ले के अपन योजना म आगु बढ़व। यदि तुमन ओखर ले मदद अउ सलाह मांगथव त अइसन म तुमन जेन बुता करत हव, ओखर ले ओहर कम असुरछित महसूस करही अउ तुंहर काम ल समझे के परयास करही। एखर ले तुमन दूनों ल फायदा होही।
4. अपन घरवाला ल समझावव के अगर ओहर तुंहर सहायता करही त तुंहर दूनों के जिनगी बेहतर होही, एखर ले तुंहर परिवार के आमदनी बढ़ही अउ तुमन जेन पइसा कमाहु ओला अपन परिवार म खरचा करहू।
5. अपन घरवाला ल बतावव के, परिवार के आमदनी बढ़े ले परिवार के मुखिया के रूप म समाज म ओखर इज्जत बढ़ही। कईझन पुरूसमन ल अइसन डर होथे के अगर उंखर घरवाली घलोक पइसा कमाही त लोगन ओला नीचा देखंही। अपन घरवाला ल समझावव के ये बात सच नइ होवए अउ दूनों के कमाए ले समाज म जादा सम्मान मिलथे।
6. अपन घरवाला ल बतावव के तुंहर परिवार के आमदनी बढ़े ले, तुमन दूनों मन अपन लईकामन ले बने असन पढ़ा-लिखा सकहु। हर ददा हा अपन लईकामन के भविस के संसो करथे अउ ओ हर मानथे के आज के दुनिया म बढ़िया सिछा ले बढ़िया तनखा वाले नउकरी मिलथे। अगर तुंहर घरवाला अपन लईकामन बर बने-बने सोंचथे, त ओ हर ए मउका ल नइ छोड़ही।
7. अइसन माईलोगन के उदाहरन देवव, जेन मन कामकाज करे बर बाहिर जथें या जेन मन अपन कोनो रोजगार करथें, अउ एखर ले उंखर परिवार ल कइसे फाइदा होए हे।
8. अगर, ये सबो परयास करे के बाद म घलोक, तुंहर घरवाला हर तुमन ल काम करे के अनुमति नइ देवत हे त, विवाद के हल बर परिवार के कोनो दूसर सदस के सहायता लेवव। एखर बर तुमन दूसर माईलोगन के तको मदद मांग सकत हव, अउ उंखर ले पूछ सकत हव के ओमन अपन घरवाला ल कइसे समझाइन हें।
जरूरी बात: पुरूस के सर्वोच्चता उपर सवाल झन उठाव या उंखर बराबरी करे के कोसिस झन करव। तुमन जइसन बदलाव चाहत हव, ओखर ले तुंहर घरवाला ल खतरा महसूस नइ होना चाही।