लईकामन ल लेके का-का झगरा होथे?
From Audiopedia
कई देस असइन हे जिहां माईलोगन ल उंखर परिवार भीतर ओतका महातम अउ सम्मान नइ दे जाए। खासकर के बिकाससील देसन म बाबूमन ल, नोनीमन के तुलना म जादा महातम दे जथे। काबर के बाबूमन संग आस करे जथे के ओमन सियानी म अपन दाइ-ददा के सहायता करहीं। एखरे सेती, अइसन परिवार म नोनीमन के बजाए, बाबूमन के सिछा अउ सेहत म जादा धियान दे जथे। लेकिन अब माईलोगन ये रीत ले राजी नइ हें, ओमन अपन नोनी मन बर घलोक बने जिनगी चाहथें अउ परंपरा ल चुनौती देवत हें। ओमन अब अपन घरवाला संग ए बारे म गोठियाए बर तइयार हें।
दुनिया भर म कानूनी रूप ले परतिबंध के बावजूद कईठन देस म ए धारना हे के नोनीमन परिवार अउ समाज उपर बोझा होथें। अभी तको कई देस म गर्भवती माईलोगन उपर दबाव डाले जथे के ओमन कन्या भ्रून के गर्भपात करा देवएं। कई पइत त नोनीमन ल बने असन स्वास्थ्य देखभाल अउ जेवन नइ दे जाए। उदाहरन बर, भारत म हर बछर करीब 7.5 लाख नोनीमन के गर्भपात कर दे जथे। अइसन म कोनो महिला ल अपन नोनी ल बचा पाना अब्बड़ मुसकिल हो जथे।
कईठन बिकाससील देस म माईलोगन उपर बेटा पइदा करे के अब्बड़ दबाव होथे। जेन माईलोगन मन बेटा ल जनम नइ दे सकें, उंखर संग उंखर ससुरार वाले मन अकसर दुरबेवहार करथें, ओमन ल परताड़ित करथे। कई पइत त ओमन ल घर ले बाहिर घलोक निकाल दे जथे। ओमन ल, बेटा जनम नइ दे बर दोसी माने जथे। अइसन म परिवार म उंखर स्थिति कमजोर हो जथे।