रजोनिवृत्ति के दउरान बने-बने महसूस करे बर मैं का कर सकत हवं?
From Audiopedia
रजोनिवृत्ति जिनगी के एकठन सामान्य हिस्सा होथे। भले कईझन माईलोगन एखर दउरान थोड़कन असहज महसूस करथें, लेकिन जादातर माईलोगन अपन आदत अउ खान-पान ल बदल के बने-बने महसूस कर सकत हें।
रजोनिवृत्ति के गंभीर लकछन ले राहत पाए बर डाक्टर मन एस्ट्रोजन अउ प्रोजेस्टेरॉन के दवई ले के सलाह देथें। एला \"हारमोन रिप्लेसमेंट थेरेपी\" (एचआरटी) केहे जथे। लेकिन दुरभाग ले एचआरटी ल अब माईलोगन मन म स्तन कैंसर, दिल के रोग, खून के थक्का अउ स्ट्रोक के खतरा के रुप म देखे जथे। एखर सेती बने होही के माईलोगन ए दवई के सेवन ले बचएं।
अगर तुमन ल कोनो अइसन लकछन मिलत हे, जेखर ले तुमन ल बने नइ लगत हें, त ए-ए परयास करना चाही:
अइसन कपड़ा-लत्ता पहिनव, जेला पसीना आए ले झटकन तुमन उतार सकव।
गरम या मसालादार नइ खाना-पीना चाही। एखर ले अचानक पसीना आ सकत हे।
जादा चाय-कॉफी नइ पीना चाही। एमा कैफीन होथे, जेखर ले तुमन ल घबरासी लग सकत हे। अउ तुमन ल नींद पड़े म तकलीफ हो सकत हे।
रोज बयाम करना चाही।
अगर तुमन दारू पीथव, त कम मातरा म पीना चाही। दारू ले रक्तस्राव अउ पसीना के अवई हा बाढ़ सकत हे।
बीड़ी-सिगरेट पीना या फेर माखुर खाना बंद करना चाही। ए हा असामान्य रक्तस्राव के कारन बन सकत हे अउ कमजोर हड्डी के समसिया ले अउ खराप कर सकत हे।
अपन परिवार के दूसर सदस ल समझाना चाही के, ए दउरान तुंहर भाउना म कई पइत बदलाव अथे। रजोनिवृत्ति ले गुजरत माईलोगन ले अपन लकछन के बारे म बताए ले घलो तुमन ल मदद मिल सकत हे।
अपन जातसमाज के पारंपरिक उपचार के बारे म पता लगाना चाही। जेन माईलोगन मन रजोनिवृत्ति ले गुजर चुके हें ओमन अइसन कोनो उपचार जानत होंही, जेखर ले तुमन ल मदद मिल सकत हे।