यौन संचारित संकरमन माने एसटीआई हर एक पराकर के अइसन संकरमन होथे, जेन हर यौन संबंध बनाए के दउरान एक मनखे ले दूसर मनखे करा पहुंचथे। कोनो भी परकार के यौन संबंध एसटीआई के कारन बन सकत हे। एमा लिंग ले योनि वाला यौन संबंध, लिंग ले गुदा वाला यौन संबंध या फेर मौखिक यौन संबंध (मुंह ले लिंग, मुंह ले योनि) सामिल हे। कई पइत त एसटीआई ले संकरमित लिंग या योनि ल कोनो दूसर मनखे के जननांग म रगड़े म तको एसटीआई हो सकत हे। अगर कोनो गर्भवती महिला ह एसटीआई ले परभावित हे, त जनम के पहिली या फेर परसव के दउरान लईका ल तको एसटीआई हो सकत हे। एसटीआई ले एचआईवी के बीमारी होए के खतरा तको रहिथे।
अगर एखर तुरते इलाज नइ कराए जाही, त एसटीआई हर अइसन सबो समसिया कारन बन सकत हे:
पुरुस मन अउ माईलोगन म बांझपन।
लईका के बखत के पहिली जनम होना, ओखर बने असन ले विकास नइ होना, कभु-कभु मरे लईका पइदा होना।
गरभासय के बाहिर नली म गर्भावस्था होना।
गंभीर संकरमन के कारन मउत हो जाना।
पेट के तरी वाला हिस्सा म भारी बेरा ले पीरा रहिना।
गरभासय ग्रीवा के केंसर।
अगर आदमी-औरत, दुनों झन ल एसटीआई हे त, तुरते इलाज करे ले कईठन गंभीर समसिया ल रोके जा सकत हे।