एचआईवी अउ दूसर यौन संचरित संकरमन ले खुद ल सुरछित रखव: अपन साथी के जननांग के तुंहर जननांग ल छुए के पहिली लेटेक्स कंडोम ल पहिन लेना चाही।
यौन संबंध म कईठन खतरा होथे, फेर एला सुरछित बनाए के उपाय तको हावयं। हमन लोगन ल ये सुरता कराए के खातिर “सुरछित” यौन संबंध कहत हावन के कमती खतरा हा कोनो खतरा के बरोबर नो हरे। सुरछित यौन संबंध तुंहर जान बचा सकत हे।
हर कोनो महिला ल ये तय करे के जरुवत हे के ओ हर कतना खतरा उठा सकत हे अउ यौन संबंध ल सुरछित बनाए बर ओ हर का-का कर सकत हे। खतरा कम करे के नीचे म कईठन विधि बताए गे हे:
अब्बड़ सुरछित:
यौन संबंध झन बनावव। अगर तुमन यौन संबंध नइ बनाहुं, त तुमन ल एसटीआई नइ होहि। कईझन माईलोगन ल ये हर बने विकल्प लग सकत हे बिसेसकर जब ओमन जवान हे। लेकिन जादातर माईलोगन बर ये विकल्प हा संभव या चाहे ले नइ होवए।
सिरिफ एकेझन साथी संग यौन संबंध बनावव। जेला तुमन सही ढ़ंग ले जानथव के तुंहर साथी केवल तुंहर संग ही यौन संबंध रखथे अउ तुमन पिछला कोनो भी साथी संग संकरमित नइ होए हव। एखर जानकारी एसटीआई के जांच ले ही हो सकत हे।
अपन हाथ ले जननांग ल छूके यौन संबंध बनावव (आपसी हस्तमैथुन) ।
मौखिक यौन संबंध के दउरान कंडोम के परयोग करव। लेटेक्स या प्लास्टिक वाले कंडोम गला म हर्पीज अउ गोनोरिया संकरमन ले बचाथे। साथ म ए हर मुंह के माध्यम ले एचआईवी संकरमन के खतरा ल तको बचाथे।
सुरछित:
योनि या फेर गुदा मैथुन करत बेरा हमेसा लेटेक्स कंडोम बउरव।
अइसन तरीका ले यौन संबंध बनावव, जेखर ले तुंहर साथी के सरीर के तरल पदार्थ तुंहर योनि या फेर गुदा म झन जाए। मौखिक यौन संबंध ले एचआईवी फइले के खतरा कम होथे। अगर तुंहर मुंह म वीर्य चले जाथे त ओला तुरते थूक देव या फेर लील देव।
खतरा कम करे के दूसर तरीका:
पुरुस साथी ल कहव के वीर्य निकले के पहिली ओ हर अपन लिंग ल बाहिर कर दे। अगर ओला एचआईवी हे त तुमन ल भी एचआईवी हो सकत हे, या फेर तुमन गर्भवती हो सकत हव फेर एखर अतका संभावना नइ हावय काबर के कमती वीर्य तुंहर सरीर के भीतरी म जथे।।
डायाफ्राम के उपयोग करे ले तको तुंहर बर खतरा कम हो सकत हे।
सूख्खा यौन संबंध ले बचव। जब योनि (या गुदा) सूख्खा होथे, त एमा चमड़ी फटे के संभाउना रहिथे, जेखर ले संकरमन के संभाउना जादा बढ़ जथे। योनि ल चिकना बनाए बर थुकल, सुकरानुनासी या फेर कोनो चिकनई के परयोग करव। अगर तुमन कंडोम बउरत हव त तेल, लोशन या जेल के उपयोग झन करव, एखर ले कंडोम फट सकत हे।
अगर तुमन ल कोनो भी परकार के एसटीआई हे, त ओखर इलाज करवाव। एक परकार के एसटीआई होए ले एचआईवी या फेर दूसर परकार के एसटीआई होए के संभाउना जादा रहिथे।