मोला अपन मासिक चक्रमासिक धर्म चक्र के बारे म का जानना चाही?
From Audiopedia
अपन प्रजनन बछर के दउरान हर महीना म लगभग एक पइत अइसे होथे, जब कोनो महिला के गरभासय ले खून वाला तरल पदार्थ गरभासय ले निकलथे अउ ओखर योनि डाहर ले, ए पदार्थ ह सरीर ले बाहिर निकल जथे, अइसन कइ दिन तक चलथे। इही ल मासिक रक्तस्राव, मासिक चक्र या फेर महवारी कहिथे। ए हर एकठन स्वस्थ प्रक्रिया होथे अउ सरीर ल गर्भावस्था बर तैयार करे के तरीका के हिस्सा होथे।
जादातर माईलोगन, महवारी ल अपन जिनगी के सामान्य हिस्सा मानथें। लेकिन जादातर माईलोगन ल ए पता नइ होवए के अइसन काबर होथे या फेर एमा बदलाव काबर होथे।
हर कोनो महिला बर महवारी अलग-अलग होथे। एखर सुरूवात महिला के महवारी के पहिली दिन ले होथे। जादातर माईलोगन ल हर 28 दिन म महवारी होथे। लेकिन कईझन म 20 दिन या फेर 45 दिन म तको होथे। जइसे-जइसे कोनो महिला के उमर हर बढ़त जथे, या फेर लईकामन के जनम के बाद या फेर तनाव के कारन, महवारी के बीच के बेरा हर तको बदलत जथे।
अंडासय म पइदा होए वाले हारमोन एस्ट्रोजन अउ प्रोजेस्टेरोन के मातरा हर बदलत रहिथे। महवारी के पहिला हिस्सा के दउरान, अंडासय हा एस्ट्रोजन जादा बनाथे, जेखर ले गर्भ म रक्त अउ ऊतक के एकठन मोटा परत बन जथे। ओखर सरीर हर एकठन अस्तर बनाथे, ताकि अगर ओ महिला हर ओ महीना म गर्भवती होथे त लईका के विकास बर एकठन नरम झाला असन बन जाए।
महवारी के चक्र के आखिर ले लगभग 14 दिन पहिली, जब नरम परत तैयार हो जथे, त अंडासय ले अंडा निकलथे। एला ओव्यूलेसन कहिथे। तहाने अंडा हा एकठन नली डाहर ले, गरभासय म चल देथे। ए बेरा महिला हर जननछम होथे अउ ओ हर गर्भवती हो सकत हे। अगर ओ महिला हर ए दउरान यौन संबंध बनाथे, त पुरूस के सुक्रानु हर ओखर अंडा ले जुड़ सकत हे। एला निसेचन कहे जथे अउ इही हर गर्भावस्था के सुरूवात माने जथे।
चक्र के आखिर 14 दिन के दउरान, जब तक ओखर अगला महवारी सुरू नइ हो जाए, महिला हर प्रोजेस्टेरोन के उत्पादन करथे। प्रोजेस्टेरोन हर गरभासय के परत ल गर्भावस्था बर तैयार करे म मदद करथे। जब अंडा निसेचित नइ होवए, त गर्भ के भीतर अस्तर के जरूवत नइ होवए। अंडासय, एस्ट्रोजन अउ प्रोजेस्टेरोन के उत्पादन ल बंद कर देथे अउ ए अस्तर हर टूटे बर लगथे। महवारी के दउरान, जब गरभासय के भीतरी म, ए परत हर सरीर ल छोड़ देथे, त अंडा घलो बाहिर आ जथे। फेर नवा महवारी होए बर लगथे। एखर बाद, अंडासय फेर ले एस्ट्रोजन बनाए बर सुरू कर देथे अउ नवा परत बने बर चालू हो जथे।