एक पइत जब कोनो मनखे सारीरिक लत उपर काबू पा लेथे, त ओला ए सीखे बर लगथे के दुबारा अइसन नइ करना हे अउ हमेसा नसीला जिनिस अउ दारू ले मुक्त रहिना हे। एखर बर, जरुरी के हे के जिनगी के समसिया ले निपटे के कउसल सीखे जाए। अइसन करई सहज नइ होवए, एमा अब्बड़ बेरा लगथे।
दारू या नसीला जिनिस के सेवन करइया माईलोगन अक्सर अपन आप म सक्तिहीन अउ सरम ले भरे महसूस करथें। ओमन ल ये सीखे बर पड़थे के अपन जिनगी म बदलाव लाए बर, ओमन सक्षम हें। छोट-छोट बदलाव के जरिये सुरु करना चाही। एखर ले अपन आप ल मदद मिलही, के मैं हा अपन समसिया के सामना कर सकत हवं।
इहां कुछ बात बताए गेहे, जेखर ले माईलोगन अपन भीतर नसा ले लड़े के कउसल पइदा कर सकत हें:
दारू तियागे के बाद, जतना जल्दी हो सकय अब्बड़ अकन प्रोटीन, बिटामिन अउ खनिज वाले खाए के जिनिस ल खाना चाही। ये खाए के जिनिस मन हा खुद ल ठीक करे म मदद करथें। अइसन जिनिस म, खमीर, गहूं के रोटी, अनाज, फल्ली अउ हरियर साग-भाजी सामिल हे। साथ म मल्टी-बिटामिन या फेर बी-काम्प्लेक्स के गोली तको खाए जा सकत हे।
जरुवत पड़े म अपन करीबी लोगन ले सहायता मांगना चाही। जब तुमन अपन समसिया के बारे म दूसर संग गोठबात करथव त, समसिया के हल निकालना सहज हो जथे।
एक बखत म, एकेठन समसिया के हल निकाले के कोसिस करना चाही। अइसन म कोनो समसिया जादा बड़े नइ लगही। अउ तुमन ओखर सामना कर सकहू।
तुमन कइसन महसूस करत हव, कोन बात हा तुमन ल परसान करथे, कोन बात ले तुमन दुखी या गुस्सा होथव, ए सबो के बारे म कोनो संगवारी संग गोठबात करना चाही। अइसन करे ले तुमन ल ये समझे म मदद मिलही कि तुमन ये सब काबर महसूस करथव अउ एखर ले उबरे बर का करे जा सकत हे।
अपन समुदाय ल बेहतर बनाए बर दूसर मन संग मिलके कोनो नवा काज उपर काम करना चाही। एखर ले तुमन ये साबित कर पाहू कि तुमन जानथव के बदलाव बर कइसे काम करे जथे। अइसन करे ले तुंहर भीतर घलो बदलाव आए म मदद मिलही।
जेनमन दारू अउ दूसर नसीला जिनिस ले मुक्त होए के कोसिस करत हें, उंखर संग नियमित रुप ले मिलना चाही।
अइसन जघा म जाए ले बचना चाही जिहां, दारू या नसीला जिनिस के उपयोग होथे। अइसन सामाजिक कारकरम करना चाही जिहां नसा के उपयोग नइ होवए।