मैं हा केंसर ल कइसे रोक सकत हवं?
From Audiopedia
स्वस्थ जीवन यापन ले कई परकार के केंसर ल रोके जा सकत हे। मनखे ल पोस्टिक जेवन खाना चाहिए अउ अइसन जिनिस ले बचना चाही, जेन केंसर के कारन बन सकत हे। उदाहरन बर:
बीड़ी-सिगरेट झन पीयव अउ माखुर झन खावव।
अपन घर या जिहां काम करथव, उहां हानिकारक रसायन नइ रखना चाही। खान-पान के जिनिस अउ पेड़-पउधा म घलोक हानिकारक रसायन के परयोग नइ करना चाही।
जादातर माईलोगन ल स्तन के गठान होथे। एहा अकसर नरम, तरल पदार्थ ले भरे (एला सिस्ट कहिथें) होथें। मासिक धरम के दउरान ये हा बदलत रहिथें। कभु-कभु दबाए म पीरा तको होथे। लेकिन कई ठन गठान केंसर बन जथें। एखरे सेती माईलोगन ल हर महिना अपन स्तन के गठान के जांच करवाना चाही।
लीवर के केंसर हेपेटाइटिस बी अउ सी के कारन होथे। सुरछित यौन संबंध अउ सुजी ल एक दूसर म नइ बउरे ले हेपेटाइटिस बी अउ सी ल रोके जा सकत हे। हेपेटाइटिस बी बर टीका घलोक लगथे। लईका के जनम के बेरा एला लगाए जथे। जवानी म घलोक एखर टीका लगाए जा सकथे।
जवान मन ल सर्वाइकल केंसर ले बचाए बर एकठन नवा टीका बने हे, एला 'एचपीवी बैक्सीन' केहे जथे अउ कई देस म एला बउरे जथे। लड़कीमन ल यौन संबंध सुरू करे के पहिली एला देना चाही। ए टीका के बारे म अपन डाक्टर ले जानकारी लेना चाही।
जरूरी बात: अगर केंसर के जल्दी पता चल जथे अउ बने-बने इलाजपानी कराए जथे, त एला ठीक करे जा सकत हे। केंसर के फइले के पहिली एखर पता चले ले कोनो महिला के परान ल बचाए जा सकत हे। अगर तुंहर इलाका म स्थानीय स्वास्थ्य सेवा हे, त केंसर के जांच बर उहां जाना चाही।