मैं हा अपन स्वास्थ्य समसिया ल कइसे रोक सकत हवं?
From Audiopedia
स्वस्थ समुदाय हा माईलोगन मन के स्वस्थ रेहे म मदद करथे। स्वस्थ माईलोगन मन अपन परिवार के बने असन जतन कर सकत हे। स्वस्थ परिवार हा समाज म जादा योगदान दे सकत हे।
माईलोगन बर बीमारी ले बचना हमेसा सरल नइ होवए। ओमन अपन परिवार अउ समाज ल स्वस्थ रखे बर अब्बड़ जतन करथें, लेकिन कईझन माईलोगन बर अपन स्वास्थ्य म धियान दे बर समय, ऊर्जा अउ पइसा जुटाए म परसानी होथे। असल म माईलोगन ल हमेसा ए सिखाए जाथे के पहिली दूसर के जरूवत ल पूरा करव, एखर सेती अपन परिवार के जतन करत ले उंखर करा अपन बर समय कमती बचथे। अगर परिवार हा सीमित संसाधन म रहिथे, त लईकामन बर अउ आदमीजात ऊपर पहिली खरचा करे जथे।
कोनो भी स्वास्थ्य समसिया के सुरू होए के पहिली, ओखर रोकथाम ले आगु चलके बहुत अकन पीरा अउ तनाव ले बचे जा सकथे। एमा ले कईठन जिनिस म जादा बेरा अउ पइसा घलोक नइ लगए। कईठन दूसर जिनिस म सुरूवात म जादा बेरा, परयास अउ पइसा लगथे। सुरूवाती रोकथाम हर कोनो महिला के स्वास्थ्य अउ ताकत ल बने बनाथे। एखर ले आगु चलके ओखर परिवार अउ समाज के स्वास्थ्य तको सुधरथे अउ जिनगी आसान होथे।