कोनो अइसन मनखे संग कोनो मेर झन जावव, जेखर संग तुमन ल बने नइ लगे या फेर जेला तुमन बने असन नइ जानव।
अगर तुमन ल कहंचो जाना हे त घर पहुंचे के रद्दा मालूम होना चाही। अगर तुमन काखरो मदद के बिना वापिस घर नइ पहुंच सको, त तुमन ल बाहिर नइ जाना चाही।
सामने वाला मनखे ल बतावव के ओखर बात या ओखर छुना-टमरना तुमन ल नइ भावे। अगर ओ हर अपन बेवहार ल नइ बदले त जतका जल्दी हो सके, ओखर ले दूरिहा हो जावव।
अगर आगुवाले मनखे (जइसे तुंहर साहब, गुरूजी, डाक्टर या कोनो अधकारी) हर तुंहर उपर हावी होए के कोसिस करत हे त, अइसन करव:
अगर तुमन ल असहज लगत हे, त पहलइया पइत म ही ओला मना कर देवव। अगर ओ हर तुमन ल डरवाए के कोसिस करत हे त ओला बतावव के तुमन डर्राएनइ हव। अगर ओ हर तुमन ल नउकरी के डर, इलाज पानी के डर जइसन कोनो डर देखावत हे त ओला देखावव के तुमन परसान नइ हव।
दूसर माईलोगन ल एखर बारे म बतावव। हो सकत हे के ओ हर दूसर माईलोगन ल घलोक परसान करे होही। अगर तुमन ल ओखर संग बेवहार बनाए रखना हे, त अपन संग म कोनो संगी रखव, अकेल्ला झन रहव। दूसर माईलोगन ल घलोक सावधान रेहे के चेतावनी देवव। धियान रखव के अगर कोनो पुरूस हर कोनो महिला उपर यौन हिंसा के माध्यम ले नियंतरन हासिल नइ करसकय, त ओ हर कोनो दूसर तरीका ले अइसन करे के कोसिस करथे।