मैं हर अपन साथी ल कंडोम बउरे बर कइसे राजी कर सकत हवं?
From Audiopedia
संकरमन अउ अनचाहा गर्भ ल रोके बर कंडोम बउरना, सबले आसान तरीका होथे। लेकिन कईझन एला नइ बउरना चाहें। इहां, कंडोम के बारे म कुछ बात बताए जात हे:
“मैं हर ओला पहिली भी बउर चुके हवं अउ मोला ओ हर सुहाए नइ।”
कभु-कभु कंडोम बउरे म बेरा लगते। ए बात म राजी होए के कोसिस करव के तुमन कुछ हफ्ता तक एखर परयोग करहू। बाद म तुमन दुनो साथी ल पता चलही के कंडोम बउरे ले भी यौन संबंध हर आनंददाइ हो सकत हे।
“मोला कंडोम लगाए म कुछु महसूस नइ होवए।”
पानी वाला चिकनई के अब्बड़ परयोग करव। एखर ले यौन संबंध के दउरान दुनो साथी ल बने लगथे। कंडोम पहिने के पहिली ओखर भीतरी नोंक म एक बूंद चिकनई डालना चाही। वइसे, ए बात हर सच हे के कंडोम के संग यौन संबंध बनाए म थोड़कन अलग लगथे। लेकिन जादातर लोगन मानथे के कंडोम के संग यौन संबंध बनाना बिलकुल नइ करे ले बढि़या होथे। कंडोम ले कतको आदमी मन ल जादा बेरा तक ले कड़ा रखे म घलो मदद मिल सकत हे।
“हमन पहिली कभु कंडोम नइ बउरे हन। अब हमला काबर बउरना चाही?”
तुमन ल अपन साथी ल समझाना चाही के अब तुमन असुरछित यौन संबंध के बारे म अब्बड़ अकन बात जानथव-समझथव। एखर ले तुमन दुनो साथी सुरछित रहु। एखर बर तुमन अइसन बहाना बना सकत हव के, तुमन परिवार नियोजन के अपन तरीका ल बदलना चाहत हव।
“मैं हर एला लगाए बर जेन करत हंव तेला रोकना पसंद नइ करवं।”
जेन जगह म तुमन यौन संबंध बनाथव, ओ तिरन कंडोम ल रखव ताकि कंडोम ल खोजे के खातिर उठना झन पड़े। जइसे तुंहर पुरुस साथी के लिंग सख्त हो जाए, तुमन कंडोम ल बउर सकत हव। अगर वो मिलत हे अउ तुमन बिसरा सकत हव त महिला कंडोम ल बउरे के कोसिस करना चाही। एला तुमन पहिली ले लगा सकत हव।
“मैं कंडोम बिसराए बर सछम नइ हवं,” या फेर कंडोम मिलत नइ हे।
कईठन स्वास्थ्य केंद्र अउ एड्स रोकथाम संगठन, मुफ्त म या फेर सस्ता म कंडोम देथें। हर पइत नवा कंडोम बउरना चाही, कंडोम ल दुबारा ले बउरना कंडोम नइ होए ले बढि़या हावय। अगर तुमन कंडोम ल दुबारा बउरना चाहत हव, त पहिली ओला साबुन-पानी म बने असन धोना चाही, फेर सुखाना चाही अउ दुबारा लपेट के कोनो ठंडा जगह अउ अंधियार म रख देना चाही। कोनो बीमारी के खतरा ल कम करे बर, दूसरा तरीका तको अपनाना चाही। जइसे, स्खलन के पहिली पुरुस साथी ल अपन लिंग ल बाहिर कर देना चाही। ए तरीका दुनो साथी बर सुरछित होथे। अगर तुमन ल कंडोम नइ मिलत हावे, त लिंग ल कोनो पतला, लचीला प्लास्टिक आवरन ले ढके के परयास करना चाही।
“एखर ले ओतका अंतरंग महसूस नइ होवए।”
कंडोम के उपयोग ल आनंददाइ बनाए के परयास करव। कंडोम लगाए के दूसर तरीका के अभियास करव, फेर यौन संबंध के पहिली एला अपन गतिविधि के हिस्सा बनावव। अगर तुमन अपन साथी के आत्मसंयम म भरोसा कर सकत हव, अउ अगर तुंहर इलाका म एचआईवी अउ दूसर एसटीआई के जांच उपलब्ध हे, त तुमन भविस म कंडोम बउरे बर बंद कर सकत हव। पहिली तुमन ल अपन जांच करवाना चाही, फेर छै महीना तक कंडोम बउरना चाही अउ दुबारा जांच करवाना चाही। ए बीच म सुरछा, ईमानदारी, वफादार रेहे अउ अगर तुमन कोनो दूसर मनखे संग यौन संबंध बनात हव, त हमेसा कंडोम ल बउरे के महत्ता उपर गोठबात करव।