मैं गर्भावस्था के दउरान स्वस्थ कइसे रह सकत हंव?
From Audiopedia
अगर तुमन गर्भवस्था के दउरान अपन स्वास्थ्य के बने असन जतन करहु त तुंहर सुरछित गर्भावस्था अउ जचकी के संभाउना जादा होथे।
अइसन हालात म परयाप्त पोस्टिक आहार लेना चाही। बने असन पोसन हर, ताकत देथे, संकरमन ले बचाथे अउ स्वस्थ लईका ल बनाथे। संगे-संग एखर ले जनम के दउरान कम खून घलोक बहिथे। तुमन ल याद रखना चाही, के तुमन हा अपन अउ अपन लईका के पेट भरत हव। ए दउरान आयोडिन वाला नुन बउरना चाही, जेखर ले लईका मानसिक मंदता ले पीड़ित नइ होहि।
परयाप्त रुप ले सुतना अउ सुरताना चाही। अगर तुमन अब्बड़ बेरा ले खड़े होके काम करथव, दिन म कई पइत लेटे अउ बइठे के परयास करना चाही। अपन रोज के काम के बीच, जभेच संभव हो सुरताना घलो चाही।
कोनो परकार के समसिया ले बचे बर, जचकी के पहिली जांच करवाना चाही अउ अगर कोनो समसिया हे त ओखर तुरते पता लगाना चाही। अगर तुमन हर टेटनेस के टीका नइ लगवाए हव, त जतका जल्दी हो सके ए टीका ल लगवाना चाही। गर्भावस्था पूरा होए के पहिली एखर दु टीका जरुर लगवाना चाही।
'गर्भावस्था के दउरान खतरा के लकछन' के बारे म पढ़ना चाही अउ जानना चाही के कब कोनो स्वास्थ्य कार्यकर्ता ले मिलना जरूरी हे।
साफ-सुथरा रहिना चाही। एखर बर हर रोज नहाना चाही अउ अपन दांत के घलोक सफई करना चाही।
खिंचाव वाला बयाम करना चाही, ताकि जनम के बाद तुंहर योनि मजगुत हो सके।
रोजेच बयाम करना चाही। अगर तुमन बइठे-बइठे काम करथव, त दिन म थोड़कन रेंगना घलो चाही। लेकिन खुदेच ल थकाना नइ चाही।
अगर तुमन ल लगथे के तुमन ल कोनो यौन संचरित संकरमन (एसटीआई) या कोनो दूसर संकरमन हे त तुमन ल ओखर इलाज करवाना चाही।
एचआईवी के परीछन करवाना चाही। गर्भवस्था के दउरान अगर यौन संबंध बनात हव त कंडोम बउरना चाही। एखर ले एचआईवी ले बचाव होथे।
जब तक कोनो स्वास्थ्य कार्यकर्ता जेन जानथे के तुमन गर्भवती हावव वो हा ठीक नइ कहे तब तक ले कोनो दवई-गोली या जड़ी-बूटी ल नइ लेना चाही।
गर्भावस्था के दउरान, बीड़ी-सिगरेट, तम्बाकू अउ दारू नइ पीना चाही। एखऱ ले महतारी अउ पेट के लईका, दुनो झन ल नकसान हो सकत हे।
जिहां तुमन रहिथव, अगर उंहा मलेरिया फइले होही, त मच्छर के काटे ले बांचे बर मच्छरदानी लगाके बिसना म सुतना चाही।
कीटनासक, साकनासक या फेर फेक्टरी के रसायन ले बचना चाही। एखर ले लईका ल नकसान हो सकत हे। अइसन पदार्थ ल छुना नइ चाही, ओखर तीर म काम नइ करना चाही या फेर ओखर धुंगिया ल नइ लेना चाही। इंखर बरतन म कभु जेवन या पानी तको नइ रखना चाही।
अइसन लईका जेखर पूरा सरीर म दाना हे, ओखर ले दुरिहा रहना चाही। एखर ले जरमन खसरा हो सकत हे, जेन लईका ल नकसान पहुंचा सकत हे।