मैं कोढ़ रोग से पीड़ित कोनो मनखे के कइसे सहायता कर सकत हवं?
From Audiopedia
सबले पहिली, ये अब्बड़ जरुरी हे के आपमन कोढ़ के बीमारी, एखर संचरन अउ इलाज के बार म बने असन समझव।
आपमन ल गलत मान्यता ल खतम करना चाही अउ सही जानकारी के पालन करना चाही। अइसन करे ले आपमन ए बीमारी ल लेके फइले डर ल कम कर सकत हव अउ फेर मरीज ल पूरा इलाज मिल सकही, ओ हर अपन सरीर के बने असन जतन कर सकही अउ आगु चलके होए वाले नुकसान ले बच सकही।
अइसन करे ले परभावित मनखे ल समाजिक तिरिस्कार के सामना नइ करे बर पड़ही। आपमन ल चाही कि आप परिवार या समाज के कोनो पीड़ित मनखे संग वइसने आचरन करव जइसे आपमन दूसर मनखे संग करथव। साथे-साथ परभावित मनखे ल अइसन महसूस करावव के ओहू हर दूसर मनखे असन योग्य इंसान हे।
अगर आपमन के जातसमाज म कोढ़ के बीमारी ले ग्रसित मनखे के बारे म गलत धारना, समाजिक तिरिस्कार फइले हे, त किरपा करके कोनो स्वास्थ्य कारकरता संग एखर बारे गोठियावव। ए बीमारी के बारे म, एखर संचरन के बारे म अउ एखर इलाज के बारे म जानकारी दे बर समाज म बइठक करवाव। हर कोनो मनखे ल परभावित मरीज के मानसिक हालात ल समझे के जरुवत हे, ताकि ओ हर अपन सरीर के जतन कर सके।
अगर आपमन ल परभावित मनखे के मानसिक स्वास्थ्य ल लेके कोनो परकार के संदेह हे, त आपमन ओखर सहायता करे के परयास करव। ओखर भावना, विचार या अनुभव के बारे म ओखर गोठियावव। आपमन, ओला बता सकत हव के मनौवैज्ञानिक सहायता हासिल करे के कइठन रद्दा हे, जइसे कोनो स्वयं-सहायता समूह म सामिल होना। इहां परभावित मनखे ह अपन भावना के बारे म, अपन जइसन दूसर मरीज संग बातचीत कर सकत हे अउ सहायता पा सकत हे। ओ हर इहां अपन अधिकार के बारे म जानकारी पा सकत हे। ओ हर अपन बारे म फइसला ले बर अउ अपन जिनगी उपर नियंतरन रखे बर घलोक सीख सकत हे। वइसे, व्यक्तिगत सहायता के विकल्प घलोक मउजूद हे। एखर बारे म कोनो डाक्टर संग बात करव अउ उपलब्ध विकल्प के बारे म पूछव।
अगर आपमन ल अइसन संदेह के परभावित मनखे कोनो गंभीर समसिया ले गुजरत हे, जइसे आत्मघाती विचार, त किरपा करके तुरते डाक्टर संग बात करव। वो हर आपमन ले कोनो विसेसग डाक्टर भेजही।
अगर परभावित मनखे सहमत हे, त आपमन सरीर के जतन, इलाज अउ पुनरवास के मामला म ओखर बने मदद कर सकत हव। ‘सरीर के जतन कइसे करे जाए अउ एला आगु जादा नुकसान ले कइसे बचाए जाए’ वाले माडयूल म एखर बारे म विस्तार ले बताए गे हे। ए सबो तरीका ले परभावित मनखे तीर अपन स्वास्थ्य म सुधार करे के जादा मउका होहि। कइझन मरीज बर स्व-सहायता समूह म सामिल होना बने विकल्प साबित होथे। इहां ओ हर अपन सरीर के जतन के बारे म दूसर मनखे मन संग मिलके प्रसिक्षन ले सकत हे। इहां मरीजमन एक-दूसर ल प्रोत्साहित कर सकत हें अउ नियमित अउ परभावी जतन के बारे म एक-दूसर ल सलाह दे सकत हें। संगे-संग परभावित मनखे ल मानसिक अउ आरथिक मामला म भी सहयोग मिल सकत हे। किरपा करके कोनो स्वास्थ्य कारकरता संग बात करव अउ सहायता पाए के दूसर विकल्प के बारे म जानकारी हासिल करव।
कभु-कभु, मरीज के परिवार के सदस के रुप म आपमन ल भी समाजिक तिरिस्कार के सामना करे बर पड़ सकत हे। अगर आपमन कोढ़ ले संकरमित कोनो मनखे के जतन करत हव, त ए हर आपमन बर भी तनावपूर्ण हो सकत हे। अगर आपमन ल सहायता के जरुवत हे त कोनो स्वास्थ्य कारकरता संग बात करव अउ पारिवारिक मनोवैज्ञानिक सहायता मांगव। संकरमित मनखे के परिवार बर भी कोनो परकार के स्व-सहायता समूह हो सकत हे, जिहां आपमन अपन भावना के बारे म बात कर सकत हव अउ दूसर मनखे मन संग सहायता हासिल कर सकत हव। इहां आपमन अपन अधिकार, मरीज के अधिकार अउ उंखऱ उपयोग के बारे म जानकारी हासिल कर सकत हव। वइसे व्यक्तिगत सहायता जइसन दूसर विकल्प घलोक हो सकत हे। किरपा करके कोनो डाक्टर संग मिलव अउ उपलब्ध विकल्प के बारे म पूछव।