मैं कइसे सुरता सकत हवं?
From Audiopedia
जादातर माईलोगन अपन परिवार ल पाले-पोसे के खातिर अब्बड़ मेहनत करथे। ओमन खाना पकाथें, पिए के पानी के बेवस्था करथें अउ लकड़ी-फाटा के बेवस्था घलोक करथें। अगर कोनो महिला घर ले बाहिर काम करथे, त ओखर उपर दुहरा बोझा पड़थे। वो हर पूरा दिन कोनो कारखाना म, या कोनो कार्यालय म या खेतखार म काम करत रहिथे। अब्बड़ मेहनत अउ थकासी हर कुपोसन अउ बीमारी के कारन बन सकत हे। उंखर तीर सुरताए बर बेरा नइ बचए या फेर सरीर के ताकत बर उनला परयाप्त जेवन नइ मिल पाए।
महिला के काम के बोझा ल कम करे के खातिर, परिवार के दूसर सदस मन उंखर मदद कर सकत हें। अइसन मदद म माईलोगन संग खाना पकाना, साफ-सफई करना अउ लड़की-पानी के बेवस्था करना सामिल हो सकत हे। अइसन करे ले महिला के काम के बोझा कम हो सकत हे। नउकरी म जवइया माईलोगन ल अपन लईका के जतन करे के घलोक जरूवत होथे। कईझन माईलोगन बाल सहकारी समिति के आयोजन करथें, जिहां छोटे लईकामन के जतन करे जथे, ताकि दूसर माईलोगन हर अपन काम ल कर सकें। इहां माईलोगन मन बारी-बारी ले लईकामन के जतन करथें।
अगर कोनो महिला गर्भवती हे ओला अउ जादा सुरताए के जरूवत होथे। अइसन महिला अपन परिवार ल बता सकत हें के ओला सुरताए के काबर जरूवत हे अउ अपन काम के बोझा ल कम करे बर अपन परिवार ले मदद मांग सकत हे।
बयाम
जादातर माईलोगन अपन रोज के बुता करत बेरा भारी बयाम करथें। लेकिन कईझन माईलोगन कोनो कारखाना या फेर कार्यालय म दिन भर बिना हिले-डुले काम करथें, अइसन माईलोगन ल थोड़कन चले-फिरे अउ बयाम करे के कोसिस करना चाही। एखर ले उंखर, दिल, फेफड़ा अउ हड्डी मजगुत रही। अगर तुमन ल अपन काम के दउरान अब्बड़ देरी ले बैठे या फेर खड़े होए बर पड़थे, त तुमन ल स्वास्थ्य संबंधी समसिया हो सकत हे।
अइसन समसिया कई महीना या फेर कई बछर बाद देखई देथे। वइसे, एमा के जादातर समसिया ल रोके जा सकत हे।