गर्भपात सुरछित होही या नइ, एला बताना हमेसा आसान नइ होवए। जउन जघा म गर्भपात करे जाही, उहां जाय के परयास करव, या फेर कोनों अइसन मनखे ले ये सबो सवाल ल पूछव जउन ह उहां रेहे हे:
का गर्भपात के कारन इहां कोनो महिला के मउत होए हे या फेर ओहर बीमार पड़े हे? अगर अइसन होए हे त कोनो दूसर हस्पताल म जावव
गर्भपात कोन करही अउ ओ हर परसिछित हे के नइ? वइसे, डाक्टर, नर्स, स्वास्थ्य कार्यकर्ता अउ पारंपरिक परसव परिचारक मन गर्भपात करवा सकत हे। लेकिन अइसन मनखे जेन गर्भपात के तरीका अउ संकरमन के बारे म परसिछित नइ हे ओखर संग गर्भपात कराना अब्बड़ खतरनाक हो सकत हे।
जेन कमरा म गर्भपात होही, का ओ हर साफ-सुथरा हे? वइसे, अगर ओ हर गंदा हे अउ बेवस्थित नइ हे त शायद गर्भपात तको अइसने होही।
का हाथ धोए बर कोनो जघा हे? अगर कोनो स्वास्थ्य कार्यकर्ता तिर हाथ धोए के जघा नइ हे, त ओ हर स्वच्छ अउ सुरछित गर्भपात नइ करा सके।
का औजार हा घर म मिले या बने जिनिस असन दिखथे? घर म बने औजार ले चोंट अउ संकरमन हो सकत हे।
औजार ल कइसे साफ करे जथे अउ कीटानु ले मुक्त करे जथे? संकरमन फइलाए वाला कीटानु ल मारे बर औजार ल कोनो बने असन कीटानुनासक म भिगोए जाना चाही या फेर पानी म उबाले जाना चाही।
का गर्भपात के खरचा उचित लगत हे? अगर खरचा जादा लगत हे, त एखर मतलब यहु हो सकत हे के तुंहर स्वास्थ्य कार्यकर्ता ल खाली पइसा के चिंता हे, तुंहर स्वास्थ्य के नइ।
का उहां गर्भपात के संगे-संग दूसर स्वास्थ्य जतन के सेवा दिए जथे? कोनो भी बने असन स्वास्थ्य केंद्र हर माईलोगन बर जरूरी दूसर सेवा घलोक देथे, जइसे परिवार नियोजन के तरीका, एसटीआई के इलाज अउ एचआईवी के रोकथाम।
अगर गर्भपात के दउरान या बाद में कुछु गलत हो जथे, त उहां डाक्टर मन तुमन ल कहां ले जाही? स्थिति म तको हस्पताल पहुंचाये के खातिर हमेसा योजना होना चाही।
जरूरी बात: गर्भपात जादा खतरनाक होथे अगर:
तुंहर आखिरी महवारी ल 3 महीना ले जादा होगे हे।
तुंहर गर्भावस्था अब दिखई देथे।
तुमन जतका जादा बखत ले गर्भवती रहू, गर्भपात के बाद तुमन ल परसानी होए के ओतना जादा संभाउना रहि। तुंहर सुरछा बर, 3 महीना ले जादा के गर्भावस्था ल कोनो क्लिनिक या फेर हस्पताल म खास औजार के संग गर्भपात कराना चाही।