लइकामन बहुत कम पानी, इहां तक कि बाथटब म घलो डूब सकत हें। लइकामन ल डूबे म दु मिनट ले भी कम समय लगथे।
डूबे ले दिमागी चोंट भी लग सकत हे अउ मउत घलो हो सकत हे। लइकामन ले डूबे ले बचाना हे त दाई-ददा या फेर कोनो बड़का मन ल चाही कि जब लइका पानी म या फेर ओखर तीर तखार म हे त बराबर निगहबानी करत रहएं।
जिहां भी अब्बड़ अकन पानी हे, उहां ये बात के धियान रखना जरुरी हवय:
कुआं अउ पानी टंकी ल ओधा देना चाही, ताकि लइकामन ओला खोल न सकय
जब टब अउ बाल्टी के उपयोग नइ करे बर होए त उनला उलट के रखना चाही। जेन लइका नहात हे ओखर बराबर निगहबानी करना चाही।
लइकामन ल गहिरा गढ्ढा अउ नाली ले दुरिहा रखना चाही।
जेन मन नदिया-तरिया मेरन रहिथें, ओमन ला अपन घर-दुआरी के आगु बाड़ी लगा देना चाही। नानकिन लइका ल पानी डहर जाए ले रोके बर घर के कपाट ला ओधा के रखना चाही।
लइकामन ल पानी डहर जाए ले बचाए बर तरिया अउ पोखर ल चारों डहर से रेलिंग लगा के घेरना चाही।
जौन मन पानी के बीच म रहिथें, ओमन ल चाही कि अपन छत, खिड़की अउ दरवाजा म पट्टी लगा के रखएं, जेखर ले लइकामन पानी म झन गिरय ।
लइकामन ल ननपल ले तइरे बर सीखना चाही।
नान्हे लइका अऊ जेन लाइकामन ल तइरे बर नइ आवए ओमन ल पानी में खेले अऊ डोंगा म चढ़े के बेरा लाइफ जेकेट पहिनाना चाही।
जेन लइका तइरत हवय, ओखर हमेशा निगहबानी करना चाही।
लइकामन ल यहू सीखना चाही कि कभु भी तेज बहाव वाले नदिया-नरवा म झन तइरैं अउ बाढ़ वाले इलाका म अकेल्ला झन तइरैं।
जब पानी अचानक बढ़े ल धरय त लइकामन उपर खास धियान रखना चाही।
परिवार के सब्बो झन ल, जेमा समझदार लइका तको सामिल हे, ये बात के धियान रखे जाना चाही कउन जगह सुरछित हे, ताकि बेरा पड़ए त तुरते उहां तक पहुंचे जा सके।