मूत्रासय अउ गुरदा के संकरमन ल रोके बर मैं हा का कर सकत हवं?
From Audiopedia
यौन संबंध के दउरान, योनि अउ गुदा के कीटानु मूत्र दुवार ले नीचे डहर के मूत्र नाली म जा सकत हे। इही हा माईलोगन म संकरमन के सबले आम कारन हे। एखर ले बांचे बर यौन संबंध के बाद पिसाब करना चाही। एखर ले मूत्र नाली धोवा जथे (लेकिन ए हा गर्भधारन ल नइ रोकए)।
अब्बड़ अकन पानी अउ तरल पदारथ ल पीयव:
जब कोनो महिला परयाप्त मातरा म पानी या दूसर तरल जिनिस नइ पीये, त रोगानु ओखर सरीर म घुस जथे, या फेर उंखर संख्या हा बाढ़ जथे, खासकर गरमी के दिन म। सिरिफ मूत्रासय म रोगानु पनपथे। दिन म कमती ले कमती 8 गिलास या दु लीटर तरल पदारथ पीये के कोसिस करना चाही। जादा घाम अउ गरम कमरा म हव त अउ जादा पीयव।
हर तीन-चार घंटा म पिसाब करे के कोसिस करव:
पिसाब नइ करे ले मूत्र परनाली म कीटानु मन पनपे ल लगथें, जेखर ले संकरमन हो सकत हे। एखरे सेती जादा बेरा ले बिन पिसाब करे नइ रहिना चाही (जइसे, जात्रा करत बेरा या काम करत बेरा)।
अपन जननांग ल साफ-सुथरा रखव:
जननांग अउ बिसेस रूप ले गुदा डहर ले रोगानु मन मूत्र दुवार म घुस सकत हें अउ संकरमन के कारन बन सकत हें। हर दिन जननांग ल धोए के कोसिस करना चाही। मल तियागे के बाद आगु-पाछु डहर ल बने असन धोना-पोंछना चाही। नोनी मन ल घलोक एखर तरीका सीखना चाही। एखर अलावा, यौन संबंध बनाए के पहिली अपन जननांग ल धोना चाही। मासिक धरम बर बउरे वाले कपड़ा अउ पेड के परयोग के बीच साफ-सफई रखना चाही।