महवारी के बंद होवइ रजोनिवृत्ति मोर सरीर अउ जिनगी ल कइसे परभावित करथे?

बाढ़त उमर के एकठन मुख्य लकछन हे के कोनो महिला के महवारी बंद हो जथे। अइसन अचानक तको हो सकत हे या फेर एक-दु बछर के भीतरी म धीर लगाके होथे। जादातर माईलोगन मन म अइसन बदलाव 45 ले 55 बछर के उमर के बीच म होथे।

लकछन:

• तुंहर महवारी म बदलाव होए बर लगथे। ये हा या तो पूरा ढंग ले रुक जथे या फेर थोरिक देर बर होके बंद हो जथे। या फेर पहिली कुछ महीना तक रक्तस्राव बंद हो सकत हे अउ फेर दुबारा रक्तस्राव सुरू हो सकत हे।

• कभु-कभु तुमन ल अचानक अब्बड़ गरमी लगे ल लगथे अउ पसीना आए बर लगथे। (एला हाट फ्लैसेस कहिंथे) । एखर ले तुमन रात म अचानक जाग सकत हव।

• तुंहर योनि छोटेकुन अउ कम गिल्ला हो जथे।

• तुंहर भाउना म अचानक बदलाव अथे।

अइसन लकछन एखर सेती दिखथे, काबर के कोनो महिला के अंडासय म अंडा बने बर बंद हो जथे अउ ओखर सरीर म एस्ट्रोजन अउ प्रोजेस्टेरॉन हारमोन कम बने ल लगथे। जइसे-जइसे ओखर सरीर ल कम एस्ट्रोजन के आदत पड़े ल लगथे, ये लकछन हा दूर हो जथे।

कोनो महिला अपन महवारी के खतम के बाद कइसन महूसस करथे, ये हर ए बात उपर निरभर करथे के ओखर सरीर म होवइया बदलाव, ओला कइसे परभावित करथे। ये यहु बात उपर निरभर करथे के ओखर जातसमाज म बुजुर्ग माईलोगन के बारे म का-का सोंचथे अउ उंखर संग कइसन बेवहार करथे। भलकुन ओला मासिक धरम ले राहत मिल जथे, लेकिन ओला ए बात के दुख हो सकत हे के ओखर अउ लईका नइ हो सकए।

Sources

• Audiopedia ID: hne_08_1