महवारी के दउरान, गरभासय अस्तर ल बाहिर धकेले बर ओ हर पहिली सिकुड़ जथे। एखर ले पेट के निचला हिस्सा या फेर पीठ के निचला हिस्सा म पीरा हो सकत हे, जेला कभु-कभु एंठन घलो कहिथन। अइसन पीरा, महवारी सुरू होए के पहिली या सुरू होए तुरते बाद तको हो सकत हे।
का करना चाही:
अपन पेट के निचला हिस्सा ल रगड़ना चाही। एखर ले खिंचे मांसपेसी ल आराम मिलथे।
एकठन प्लास्टिक के बोतल म या कोनो बरतन म गरम पानी भरव अउ एला अपन पेट के निचला हिस्सा म या फेर पीठ के निचला हिस्सा म रखव। गरम पानी म भीजे कोनो साफ मोटा फरिया के तको परयोग करे जा सकत हे।
अगर अंगूठा अउ पहिली अंगरी के बीच के कोमल जगह ल जोर के दबाए ले तको कईठन पीरा ले राहत मिल सकत हे।
रसभरी के पत्ता, आदा या कैमोमाइल के चाय पीना चाही। या फेर तुंहर समाज के माईलोगन कुछु दूसर परकार चाय बनात होंही या कुछु दूसर इलाज जानत होंही, त ओखर उपयोग करना चाही।
अपन रोज के काम बुता ल करत रहव।
बयाम करे अउ रेंगे के परयास करना चाही।
हल्का पीरा के दवई खाए जा सकत हे। महवारी के दउरान होए वाले पीरा बर इबुप्रोफेन बढ़िया काम करथे।
अगर तुमन ल अब्बड़ जादा रक्तस्राव होथे अउ कुछु इलाज काम नइ करत हे, त 6 ले 12 महीना बर कम खुराक वाले जनम नियंतरन के गोली ले घलो मदद मिल सकत हे।