महतारी के दूध के अलावा कोनो दूसर दूध काबर हानिकारक हो सकथे?
From Audiopedia
दूध बनइया कंपनीमन चाहथे कि माईलोगिन मन अपन लइका ल अपन दूध के बजाए बने-बनाए दूध पियाए, जेखर ले ए कंपनीवाले मन पइसा कमा सकय। धियान रहे के बोतल म दूध पियाना अउ बने-बनाए दूध बढ़िया नइ होवय। अइसन दूध पियइया लाखों लइकामन कुपोषित अउ बीमार रहिथें। कइझन तो मर घलो जाथे।
बने-बनाए अउ आने दूध जइसे डब्बावाले दूध या फेर जानवर के दूध लइकामन ल बीमारी ले नइ बचा सकय।
बने-बनाए अउ आने दूध बीमारी अउ मउत के कारन बन सकत हे। अउ फेर कहूं बने-बनाए दूध पियाए के बेरा बोतल, निप्पल या फेर पानी ल बने देर तक नइ उबाले गे हे त ओमा किटानु रहि जाथे अउ लइका हा ये किटानु ला पी डारथे। अइसन म लइका हा बीमार हो सकत हे अउ ओला दस्त तको हो सकत हे।
महतारी के स्तन ले दूध पिए के तरीका अउ बोतल ले दूध पिए के तरीका अलग-बिलग होथे। जब लइका महतारी के दूध पीथे तब वो ह स्तन ल चूसथे अउ अपन चीब के उपयोग करथे। लेकिन जब वो ह बोतल ले दूध पीथे त मुंहु ले खींचते। अइसन म लइका ह महतारी के दूध ला चूसे बर भूला सकत हे। अउ कोन्हों वो ह अपन महतारी के दूध ल बने असन नइ चूसही त महतारी के दूध अवइ ह कम हो जथे अउ धीर-धीर लइका महतारी के दूध ल पीए बर बंद कर सकत हे।
बोतल के दूध म खरचा घलो अब्बड़ होथे। कोनो परिवार कहूं पहली साल बर बने-बनाए दूध लेथे त पूरा बछर भर म ओला 40 किलो दूध खरीदे बर लगही। अउ अइसन दूध ल उबाले बर अब्बड़ अकन ईधन तको लगथे। अइसन म भारी खरचा पड़थे। कइ बार तो अइसन परिवार के हप्ता भर या फेर महीनाभर के कमई इही म चले जाथे। कइझन दाई-ददा अइसन होथे के कइ दिन बर बने-बनाए दूध ल रखथे अउ ओला अपन लइका पियाथे, अइसन म लइका कुपोषित हो जाथे अउ ओखर बिकास धीर-धीर होथे। कइ बार त ओ हा बीमार तको हो जाथे।
जरूरी बात: अइसन माईलोगिन जेला एचआईवी के बीमारी हे ओला अपन लइका ल दूध पियाए के पहिली सुरछित तरीका के बारे म फइसला लेना चाही। एखर बर ओला डाक्टर सन बात करना चाही।