मनोबिगियान संबंधी सहायता पाए के मोर पास का-का विकल्प हे?
From Audiopedia
कोनो स्वयं सहायता समूह ले जुड़े के घलोक विकल्प हो सकत हे।
कईझन बर ए बने विकल्प साबित हो हे, काबर के इहां तुमन अपन जइसन दूसर मनखे संग अपन भाउना, बिचार अउ अनुभव ल बता सकथव। तुमन ल इहां बने सलाह मिल सकत हे। तुमन दूसर मन ल घलोक सलाह दे सकत हव। ए तरीका ले तुमन, एक-दूसर ल मजबूत बना सकत हव।
एखर अलावा, तुमन अपन देस म अपन व्यक्तिगत अधिकार के बारे म घलोक जान सकत हव। इहां तुमन अपन जिनगी के बारे म फइसला ले बर सीख सकत हव। अउ आर्थिक समसिया ले निपटे बर कोनो दूसर संग सहायता मांग सकत हव।
मानसिक अउ कानूनी मामला के अलावा, तुमन अपन जतन बर कोनो परसिकछन या फेर पुनरवास कारकरम म भाग ले बर सहायता मांग सकत हव।
अगर तुमन ल लगथे के तुंहर परिवार के कोनो सदस ल तको सहायता के जरुवत हे, त पारिवारिक मनोबिगियान संबंधी सहायता घलोक ले सकत हव। अगर तुंहर परिवार के कोनो सदस, तुंहर जतन म तुंहर सहायता करथे, त वहू हर परसिकछन ले सकत हे। ओ हर तुंहर इलाज के बारे म अउ परसासनिक काम म तुंहर मदद करे के तरीका के बारे म जान सकत हे।
एक दूसर विकल्प व्यक्तिगत सलाह दुआरा इलाज करे के घलो हो सकत हे। इहां, तुमन अपन स्वास्थ्य कार्यकर्ता संग अपन भाउना, बिचार अउ अनुभव के बारे म गोठबात कर सकत हव। ओ हर तुंहर भाउना ल समझे अउ स्वीकार करे म तुंहर सहायता करही। ओ हर कई परकार के परिस्थिति ले निपटे के तरीका बताही अउ तुंहर मानसिक स्वास्थ्य म सुधार करे म तुंहर सहायता करही। संगे-संग, लोगन के संगठन, सरकारी सेवा, ऑनलाइन या फेर सोसल मीडिया ले घलो तुमन सहायता हासिल कर सकत हव। समाज के भीतरी सहायता पाए के दूसर विकल्प ल घलोक ढूंढव।
अतिरिक्त सहायता के रुप म दवई खाए के विकल्प घलोक सामिल हे। अगर तुमन ल अइसन लगथे, त कोनो स्वास्थ्य कार्यकर्ता संग एखर बारे म गोठबात करव।
अगर तुमन कोनो गंभीर मानसिक समसिया ले गुजरत हव, अउ तुमन ल तुरते इलाज के जरुवत हे, किरपा करके कोनो स्वास्थ्य कार्यकर्ता संग झटकुन मिलव अउ कोनो विसेसगिया डाक्टर करा भेजे बर कहव।