वइसे त लईकामन के पालन-पोसन के बारे म तुंहर अउ तुंहर घरवाला के बिचार अलग-अलग हो सकत हे, लेकिन ए बारे म अगर तुंहर बीच म कोनो किसम के मतभेद हे त, अपन लईकामन के भलई बर अइसन मतभेद ल दूर करव।
अगर कोनो महतारी पीड़ित हे, ओखर लईकामन तको पीड़ित रहीं, एखर सेती अपन मतभेद ल कम करे के या दूर करे के परयास करना चाही।
अपन घरवाला ल सुरता करावव के, महतारी-बाप के बीच खुसहाल रिस्ता, लईकामन के मनोवैज्ञानिक अउ सारीरिक कल्यान बर अब्बड़ जरूरी होथे। सुरता रखव, एक महतारी के रूप म हमन अपन लईकामन ल रोज अइसन सब सिखाथन:
जब हमन अपन घरवाला अउ बेटा ल पहिली जेवन कराथन, त नोनीमन अउ माईलोगन के भूख हर कम जरूरी होथे।
जब हमन सिरिफ अपन बेटा ल इस्कूल भेजथन त नोनीमन के सिछा के अवसर हर कमती होथे।
जब हमन अपन बेटामन ल अइसन सिखाथन के हिंसक होना मरदाना बात होथे, त हमन हिंसक पुरूस ल बढ़ावा देथन।
जब हमन अपन परोसी के घर म होवइया हिंसा खिलाफ कुछु नइ बोलन त, हमन अपन बेटा ल सिखाथन के कोनो भी आदमी बर अपन घरवाली अउ लईकामन ल मारना जायज बात हे।
महतारी के रूप म, हमर करा अपन लईका के भविस ल बदले के सक्ति होथे। हमन ओला सिखा सकत हन के:
बाबूमन ल दयालु होना चाही, तभे ओमन बड़े होके दयालु घरवाला, ददा अउ भाई बनही।
नोनीमन ल खुद ल महातम देना चाही, जेखर ले दूसर मन संग ओमन अइसने उम्मीद करहीं।
बाबूमन ल घर के काम म हाथ बटाना चाही, ताकि उंखर बहिनी, घरवाली अउ नोनी मन उपर काम के जादा बोझा झन पड़य।
नोनीमन अपन पढ़ई पूरा करके या कोनो हुनर सीख के जादा आत्मनिरभर बनही।
बाबूमन ल सबो माईलोगन के सम्मान करना चाही अउ एक जिम्मेवार घरवाला बनना चाही