पुरूस मन के कंडोम हर पातर रबर ले बने होथे, जेला यौन संबंध के दउरान पुरूस हर अपन लिंग म पहिनथे। एखर ले बीर्य हर कंडोम म रहि जथे, जेखर ले सुकरानु हर महिला के सरीर म परवेस नइ कर पाए।
कंडोम हर गर्भावस्था ले सबले बढ़िया सुरछा देथे। सुकरानुनासक अउ पानी ले बने स्नेहक के संग तको एला बउरे जा सकत हे।
कंडोम ले कोनो किसम के दुस्परभाव नइ होवए।
कंडोम ले एसटीआई अउ एचआईवी ले तको बचाव होथे। एखर उपयोग अकेल्ला या फेर कोनो अउ बिधि के संग म करे जा सकत हे। दवई दुकान म कंडोम मिलथे। वइसे स्वास्थ्य केंद्र अउ एड्स रोकथाम कारीकरम के डहर ले घलोक कंडोम ल बाँटे जथे।
कंडोम ल महिला के योनि ल छुए के पहिली पुरूस के लिंग म तब लगाना चाही, जब ओ हर कड़ा हो जथे। लेकिन अगर कंडोम हर टूट जथे या लिंग ले निकल जथे, त महिला ल तुरते अपन योनि म सुकरानुनासक डारना चाही। अगर संभव हे त आपातकाल वाले परिवार नियोजन बिधि के उपयोग करना चाही।
सुरता रखव:
कंडोम के परयोग हर पइत के यौन संबंध म करना हे।
अगर कोनो महिला हर परिवार नियोजन के कोनो दूसर बिधि के घलोक परयोग करत हे, त ओ हर एसटीआई ले सुरछा बर कंडोम ल घलोक बउर सकत हे।
अगर संभव हे त हमेसा लेटेक्स ले बने कंडोम ल बउरना चाही। एखर एचआईवी ल रोके म मदद मिलथे। भेड़ के खाल ले बने कंडोम हर एचआईवी ले रछा नइ कर पावए।
कंडोम ल घाम म नइ रखना चाही, एला जुड़ अउ सुख्खा जगा म रखना चाही। पुराना अउ फटे पैकेट वाले कंडोम हर फट तको सकत हे।
कंडोम ल एके पइत बउरना चाही। पहिली ले बउरे कंडोम हर फट सकत हे।
कंडोम ल अपन पहुंच म रखव। जेखर ले सही बेरा म एला बउरे जा सकय।
कई जोड़ामन पहिली पइत म कंडोम ल बउरना पसंद नइ करें। लेकिन एक पइत आदत पड़े के बाद, ए हर अनचाहा गर्भधारन अउ एसटीआई ले बचाव करथे। कई पइत त कंडोम ले पुरूस के स्खलन के बेरा तको बढ़थे।
पैकेट ले खोले के बेरा कंडोम हा फटना नइ चाही। अगर पैकेट हर फटे हे या सुख्खा हे या फेर कंडोम कड़ा या चिपचिपा होगे हे त, एला नइ बउरना चाही। कंडोम ल पहिने के पहिली, ओला नइ खोलना चाही।