अगर तुमन ल लगथे कि तुंहर साथी हा सुरछित यौन संबंध बनाए म तुंहर मदद करही त, ओखर ले एसटीआई के खतरा के बारे म गोठियाए के कोसिस करव। वइसे, अइसन करना आसान नइ रहय!
काबर के माईलोगन ल यौन संबंध के बारे म जादा गोठियाए ले मना करे जथे, खासकर अपन साथी संग या फेर दूसर आदमीमन संग। वइसे एक पुरुस दूसर पुरुस ले यौन संबंध के बारे म बात कर लेथे, लेकिन ओला अपन साथी संग ए बारे म बात करे म संकोच होथे। एखर बारे म इहां कुछ सलाह दिए जाथे:
सुरछा डहार धियान देवव। जब तुमन सुरछित यौन संबंध के बारे म गोठिया थव, त तुंहर साथी हा कहि सकत हे के तुमन ल ओखर उपर भरोसा नइ हे। लेकिन ए मामला सुरछा के हे, भरोसा के नइ। कईझन मनखे ल अपन एसटीआई के बारे म पता नइ चलय, या फेर हो सकत हे के कोनो दूसर के कारन ले ओला एचआईवी होए होहि। एखरे सेती पहिली एला पक्का कर लेना चाही, के ओला कोनो परकार के संकरमन नइ हे। सुरछित यौन संबंध हा, हर एक जोड़ी बर बने बात होथे, भलकुन ओमन एक-दूसर संग ही यौन संबंध बनात होहिं।
एखर अभियास करे बर, पहिली कोनो संगवारी सिक ए बारे म गोठियावव। अपन संगवारी ल कहव, के ओ हर तुंहर साथी असन बेवहार करे, फेर तुमन जेन कहिना चाहत हव, वो कहव। फेर ओखर सवाल के जवाब दे के अभियास करव। हो सकत हे के ओ हर ए बारे म तुंहर संग बात करे बर घबराही, लेकिन ओला सहज बनाए के परयास करव।
यौन संबंध के बनात तक ले, ए सबो बारे म गोठियाए के बारे म इंतजार झन करव। कोनो बने असन बेरा देख के, जब तुमन ल बने लगत होहि, ए सबो बारे म गोठियाना चाही। अगर तुंहर नवा-नवा लईका होए हे, या तुमन एसटीई के इलाज करात हव, त दुबारा यौन संबंध बनाए के पहिली, ये सबो के बारे म गोठियाए के कोसिस करना चाही। अगर तुंहर साथी अब्बड़ दूरिहा रहिथे या फेर अकसर जातरा करत रहिथे, त पहिली ले यौन स्वास्थ्य के सुरछा के बारे म गोठिया लेना चाही।
असुरछित यौन संबंध के खतरा अउ सुरछित यौन संबंध बनाए के तरीका के बारे म जतका हो सकथे ओतका सीखना चाही। अगर तुंहर साथी ल एसटीआई के बारे म जादा जानकारी नइ हे, जइसे ए हर कइसे फइलथे अउ बाद म स्वास्थ्य म एखर का-का असर पड़थे, त ओ हर असुरछित यौन संबंध ले जुड़े खतरा ल समझ नइ पाही। सही जानकारी ले ही ओ हर सुरछित यौन संबंध के जरुवत ल समझ पाही।
ए बारे म दूसर मन के उदाहरन तको देवव (जइसे, मोर सगा हर मोला बताए रिहिस हे के ओ हर हमेसा कंडोम बउरथे) । कभु-कभु ए बारे म दूसर मन संग सीखे ले, तुंहर साथी परभावित हो सकत हे।