परिवार नियोजन ले जुड़े झगरा-लड़ई ल सुलझाए बर तुमन अउ तुंहर घरवाला ल परिवार नियोजन के उपयोग अउ बिधि के बारे म मिलजुर के फइसला करना चाही। एखर बारे म अपन घरवाला संग गोठियाना चाही। एखर बर तुमन नीचे डहर बताए गे, तरीका ल अपना सकत हव:
18 बछर ले कम उमर के माईलोगन के जचकी के दउरान मउत होए के संभाउना जादा होथे, काबर के उंखर सरीर हर बने ढंग ले बिकसित नइ होए रहय, अइसन म उंखर लईका के मउत घलोक हो सकत हे। एखरे सेती, कम उमर म लईका नइ पइदा करना चाही।
जादा उमर के माईलोगन ल लईका पइदा करे म अब्बड़ खतरा हो सकत हे, खासकर के अगर ओमन ल कोनो अउ दूसर बीमारी हे, या फेर उंखर पहिली ले कईझन लईका हें। एखर सेती, जादा देरी ले लईका पइदा करे ले बचना चाही।
गर्भधारन के बीच कोनो भी महिला के सरीर ल ठीक होए म बेरा लगथे, एखर सेती गर्भधारन के बीच परियाप्त अंतर रखना चाही। एखर ले महतारी अउ लईका, दूनों सुरक्षित रहिथें। एखर सेती दु लईका के जनम के बीच अंतर कम नइ होना चाही।
चार से जादा लईका वाले महिला ले जचकी के बाद रक्तस्राव अउ दूसर कारन ले मउत के खतरा जादा रहिथे। एखर सेती जादा लईका नइ पइदा करना चाही।
कमती लईका होए ले परिवार उपर आरथिक दबाव कम पड़ही अउ एखर ले घरवाला हर अपन परिवार उपर तको बने असन धियान दे सकथे। एखर सेती, कम लईका वाले परिवार के जिनगी के स्तर बने रहिथे अउ ओहर अपन लईकामन के बने-बने पढ़ई-लिखई के खरचा ल तको उठा सकथे।
कमती लईका रहिथे त दाई-ददा मन घलोक अपन मन बर अउ अपन लईकामन बर परियाप्त रूप ले समय निकाल पाथें।
परिवार नियोजन करे ले पति-पत्नी ल यौन संबंध बनाए बर जादा आनंद ले म मदद मिल सकत हे, काबर के ओमन ल अनचाहे गर्भधारन के डर नइ रहे।
परिवार नियोजन के फायदा के बारे म जाने के बाद म घलोक तुंहर घरवाला हर, अगर एखर बर राजी नइ होवत हे त फेर तुमन ल ही एखर बारे म फइसला करे बर पड़ही। अगर तुमन परिवार नियोजन के फइसला करथव त, तुमन ल अइसन बिधि चुने के जरूवत हो सकत हे, जेखर बारे म तुंहर घरवाला ल पता झन चले। अगर तुमन अपन लईकामन के संख्या ल नियंतरित करहु त तुमन जादा स्वस्थ रहु।
एखर सेती, परिवार नियोजन के उपयोग करे या न करे के फइसला, हमेसा तुंहर पसंद के हिसाब ले होना चाही।